पाऊस काय फक्त आभाळातूनच येतो ?

                    

 
 

मणामणांचं ओझं असतं कधी साठलेलं 

कुठेतरी खोलखोल काहीबाही दाटलेलं 

हलकासा धक्का नकळत लागतो 

धो धो भरून कोसळायला लागतो 

पाऊस काय फक्त आभाळातूनच येतो ? 

जवळचा कुणी कधी लागेलसं बोलतो 

हळव्या हृदयाला जखम करून जातो 

आवरलं कितीही तरी डोळा भरून येतो 

घातलेला बांध अवचितच फुटतो 

पाऊस काय फक्त आभाळातूनच येतो ? 

कधी कधी मात्र जीव ओथंबून जातो 

कृतकृत्य होण्याचाही एक क्षण येतो 

मनातला आनंद आभाळभर सांडतो 

अश्रूंमधून झिरपत अंगणभर नाचतो

पाऊस काय फक्त आभाळातूनच येतो ? 

मधुमती वऱ्हाडपांडे